راه اندازی تمرینات نظامی مشترک روسیه و تاجیکستان در مرز با افغانستان - شبکه تلویزیون نور


راه اندازی تمرینات نظامی مشترک روسیه و تاجیکستان در مرز با افغانستان

روسیه و تاجیکستان نخستین تمرینات مشترک نظامی علیه طالبان را در نزدیکی ولایت بدخشان آغاز کردند. به گفته مقام ها، هدف از اجرای تمرینات نظامی که سه شنبه آغاز شد، آمادگی در برابر حملات احتمالی طالبان از خاک افغانستان است.

شمال افغانستان با سه کشور شوروی پیشین، ترکمنستان، اوزبیکستان و تاجیکستان هم‌مرز است. افزایش ناآرامی‌ها در مناطق شمالی افغانستان در سال‌های اخیر، نگرانی ‌هایی را در کشورهای شوروی سابق ایجاد کرده است.

تاجیکستان یکی از شش کشور عضو سازمان پیمان امنیت جمعی است که در راس آن روسیه قرار دارد. ارمنستان، بلاروس، تاجیکستان، روسیه، قرقیزستان و قزاقستان اعضای “امنیت جمعی” استند.

روسیه و تاجیکستان مانور نظامی چهار روزه در نزدیک مرز افغانستان را به راه انداخته‌ اند که هدف آن آمادگی در برابر حمله احتمالی طالبان افغانستان اعلام شده است.

وزارت دفاع تاجیکستان گفته که در این مانور بیش از ده هزار سرباز ارتش تاجیکستان شرکت خواهند داشت. در حدود چهارصد سرباز روسی به همراه هشتاد واسطه نظامی آن‌ کشور نیز در رزمایش یاده شده شامل استند.

همکاری‌های نظامی میان تاجیکستان و روسیه از سال دوهزار و چهارده که نیروهای بین‌المللی به رهبری آمریکا شروع به ترک افغانستان کردند، افزایش یافته است.

این نخستین بار است که چنین رزمایشی در منطقه کوهستانی “گورنو بدخشان” تاجیکستان انجام می‌شود که در نزدیکی ولایت بدخشان افغانستان واقع شده است.

قاچاق مواد مخدر از افغانستان به سمت کشورهای آسیای میانه نیز از دلایل نگرانی این کشورها بوده است.

نوشته‌های مرتبط


Top